كام مرة؟
تيجي همومك
وانت في عز نومك
ترزعك قلم
تشدك من سريرك
كأنها أمن دولة وانت المتهم
يقوموك قبل ما يصحى النهار
خدلك مهلة عشان تاخد الفطار
خدلك لقمة نكد
بلعها بشاي بالضيق
وتروح تنزل على . . .ح
حرب الشارع معركة الطريق
شايل أسلحتك في لسانك وايديك
تبهدل بيهم اللي يخف دمه عليك
امضغ لبانة خنقة
أديك داخل عالزنقة
في أتوبيس أو مترو
تلقاها مستنياك
حتى لو متريش ومعاك عريبتك
جاية وراك مش عاتقاك
كام مرة؟
تخش المكتب ميت حر
تلاقي مراوح كل عليها الدهر
تلاقي عالمكتب جبال الورق
تطلب من الساعي قهوة زهق
لعلك تفوق
لعل مزاجك يروق
ويروق ازاي . . .و
والازعاج ادامي وورايا
وجنبك أم بدوي بتحكي الخطايا
وأم باتعة بتحكي مشاكلها مع الجارة
ورق ومشاكل وصداع ياربي
ياريت كله يطير مع نفخة السيجارة
وشاكي ومراجع
وصاحب حق جاي يطالب
سيبك من ده
لو حتى كنت طالب
وفي مدرج كنت حاضر
جاي تسمع رغي المحاضر
تلاقي دحيح موتور شغال
يحسسك انك آخر تسيب اهمال
واللي نايم
واللي مش دريان هو جه هنا ليه
واللي جايب صاحبته معاه
بيرغوا وقلبوها كافيه
كام مرة؟
لما نفسك تسكتهم
وتكتم أصواتهم
لما تقفل الموبايل
أو تعمله عالوضع الصامت
ساعة المحاضرة
تتمنى أن الناس عن الكلام صامت
كام مرة؟
ساعة المرواح
تمني نفسك أنك حتفرد الجتة
ورايح ترتاح
تلاقي الشوارع مقفولة
وأمن مركزي وجهات مسؤولة
تسأل اللي بيحصل يا ولاد؟؟
قردنا في شومبونجو راجع أرض البلاد
كام مرة؟
لقيت مشاكلك عالغدا معزومة
وانت الجيب فاضي والصحة معدومة
تخش تلعن اللي بدع الروتين
تفتح التلاجة
لا لحمة ولا فراخ
ولا أي نوع بروتين
وتروح تنام بمعدة فاضية
كام مرة؟
ادوك الضربة القاضية
لما يقولولك مبروك
العاطلين زادو واحد
عمالين يدوك ويدوك
لغاية ما صاحبت الهم
وبقيت عليه واخد
كام مرة؟
بكيت من الذل
اتحرقت من اللي فيك
نفسك تنسى همك
بس همك مش ناسيك
كام مرة؟
اتمنيت لو تجمع همومك
وتنفخها في قلب بالونة
وتحبسهم وتقول الوداع
من غيركم حياتي حتبقى موزونة
وتخبط عالبالونة عشان تفرقع
تفتكر . . . م
مشاكلك حترخم وترجع؟
ولا ده تخاريف واستعباط
أو فلسفة ماتت مع سقراط
ولا العيب في عقلك الباطن
اللي متبرمجش ان اسمك مواطن
كام مرة؟
سألت نفسك
هو مش اتخلقت انسان؟
كائن مكرم مش مهان
يعني بايدي أهد جبال
ويرن في بالي نفس ذات السؤال
هل ممكن اعيش مرتاح البال
هل ممكن بعد توفيق ربنا
أغير كل ده الحال
آه ممكن أكيد مش محال
كام مرة؟
قررت انك تزبط منبه الأمل
قبل ما الهم يقل عقله ويفكر يزورك
تقوم تكسر التكشيرة بابتسامة حلوة
يا صبح جديد نورني بنورك
ونفس السيناريو يتكرر
بس المرادي حشرب الشاي مسكر
حفطر طبق تفاؤل ولقمة انشراح
بلسم اداوي بيه كل الجراح
وان كشرت ظروفي دلوقتي
أكيد حتضحكلي بعدين
ولو طلعت عيني
ولو ايه ولو مين
كله يهون
طول مانا شغال صح
في سبيل أهم شئ في الكون
رضا رب العالمين ,,, ان شاء الله يعجبكوا
موضوع: كام مرة 
الأحد أغسطس 09, 2009 4:06 am
