كرسى الاعتراف

كرسى الاعتراف هيقعد عليه كل واحد فينا بس هيعترف لنفسه مش لينا ويجاوب جواه على الأسئلة دى ويواجه نفسه وطبعا هنلاقى أسئلة كتير مش قادرين نجاوب عليها ونخجل من نفسنا

-يا ترى تعرف ايه عن دينك وأحكامه وأوامره؟؟

-هل فكرت مره تجيب تجيب كتاب فقه وتقرأ فيه عشان تتعرف أكتر على دينك وتكون ملم بكل أموره؟؟؟

-ولا مكتفى بالمعلومات البسيطه اللى بنتوارثها من الأهل وبنعرفها فى المدرسه وبتقول ماهو كل الناس كدا يعنى هوا أنا بس,,, ومشغول وغرقان فى هموم الدنيا ومشاكلها وناسى انك أصلا اتخلقت عشان تعبد ربنا وتصلح الكون

-تعرف انك لو تعمقت أكتر فى أصول دينك وحكمه هتلاقى ان حاجات كتير كنت بتعملها غلط وانت فاكر انها صح أخطاء برده تواراثناها وعمرنا مافكرنا نتأكد منها ونرجع للكتب ونعرف اذا كانت صح ولا لأ

　

-تعرف ايه عن رسولك؟؟؟؟ اللى اتعذب واتألم وحارب عشان انت تنعم بنعمة انك تتولد مسلم(((النعمة اللى فى ناس كتير ناسيينها وساهيين عنها)) وعشان يوصل للعالم رسالة رب العالمين الرحيم الغفور

-تعرف ايه عن حياته وزوجاته والصحابه؟؟؟

-تعرف ايه عن سنته اللى المفروض انك تتبعها وتاخدها منهج فى حياتك؟؟

-قال رسول الله صلى الله عليه وسلم " تركت فيكم ما ان تمسكتم به لن تضلوا بعدى أبدا كتاب الله وسنتى"

　

-يا ترى بتقعد كام يوم متمسكش المصحف ولا تقرأ فيه؟؟؟

-ولما بتقرأ فيه بتفكر تفهم معانيه كويس وتفسيرها والآيات دى نزلت ليه ومعناها ايه ولا بتقرأ وخلاص زى أىحد برده؟؟

-ناسى ان الكتاب الكريم ده هو اللى فيه منهج حياتك كلها ولازم تفهم اللى فيه كويس عشان تعيش صح زى ما أمرك ربك!!!

- لحد امتى هيفضل القرآن الكريم مهجور؟؟؟

-قال تعالى " وقال الرسول يارب ان قومى اتخذوا هذا القرآن مهجورا"